Familietur på UNESCO Tafjorden

Høgdepunkt

- Kajakktur på den ukjende og fredfulle UNESCO verdsarvfjorden Tafjord

- Lokal guide med djup kunnskap om historie, tradisjonar og Tafjordulykka

Ein 5 timars tur inn i hjartet av fjord-Noregs mektige natur- og kulturarv. Tafjorden er ein liten og smal fjord i enden av Storfjorden, som er kjend for sin enorme og unike natur og geologi. Grunna fjella sine formasjonar er Tafjord ofte skjerma for vind og vêr, og har fleire gongar blitt målt som varmaste staden i Noreg.

I tillegg til å ha ein heilt spesiell naturarv, er Tafjord som bygd og samfunn tufta på ei heilt spesiell historie; Tafjordulykka i 1934.

Sjå føre deg..

..at du legg deg for kvelden. Det er fyr i peisen og storfamilien er samla mellom slitne tømmerveggar. Det er ein vanleg kveld i april, og du har fått besøk frå familie og venner langvegs frå. Nokre stemmer i ein trall på trekkspelet, medan andre nyt gode samtalar. Det er god stemning, og de legg dykk med eit smil om munnen.

Kl. 03:10 vaknar du brått av ein kraftig lyd. Det er heilt mørkt ute, og du klarer ikkje heilt forstå kva som skjer. Du blir engsteleg, og går kanskje inn for å sjå om borna har vakna av bråket. Kanskje dreg du dei ut av huset i all hast? Kva gjer du? Lyden blir sterkare, og plutseleg treff ei 64 meter høg bølgje av iskaldt vatn i stor fart.

40 menneske mista livet denne dagen, og enda fleire vart skada.

Utan vegsamband, og med båtar strødd i tusen bitar på land var hjelpeløysa stor. Eit lite isolert samfunn fekk i fellesskap oppleve eit levande mareritt, som framleis, den dag i dag, set sitt preg på den vesle bygda Tafjord.

Denne turen er ei uforgløymeleg naturoppleving, og ei unik mogelegheit til å få eit innsyn i lokal historie innan kultur, industri, krig og kjærleik.